Камітэт па правах чалавека ААН зарэгістраваў чарговую скаргу зь Віцебску

Пры канцы сьнежня 2015 году Камітэт па правох чалавека Арганізацыі Аб'яднаных Нацыяў зарэгістраваў скаргу жыхара Віцебску Пятра Бярлінава.

Акалічнасьцю, якая схіліла спадара Бярлінава зьвярнуцца ў высокую міжнародную праваабарончую арганізацыю, стала рашэньне судзьдзі суду Чыгуначнага раёну Алены Цыганковай, якая падвергла яго пакараньню ў выглядзе адміністрацыйнага арышту за ўдзел у несанкцыянаваным уладамі масавым мерапрыемстве.

А пачалася гэтая невясёлая гісторыя з кур'ёзу.

Не зьяўляючыся журналістам і не знаходзячыся ў шэрагах ніводнай палітычнай партыі або грамадзкай арганізацыі, Бярлінаў – выпадкова – узяў удзел у масавым вулічным мерапрыемстве – флэшмобе, якое 5 лістападп 2014 году ў Віцебску прывялі мясцовыя незалежныя журналісты. Публічнае мерапрыемства не было дазволенае ўладамі. А паколькі не было дазволенае, маёр міліцыі Аляксандар Рыбакоў з райаддзелу міліцыі склаў на Бярлінава пратакол аб адміністрацыйным правапарушэньні і перадаў гэты пратакол у суд.

Падчас судовага разбору судзьдзя Цыганкова не абцяжарыла сябе разабрацца ў заблытанай справе і пакарала Бярлінава да трох сутак арышту, якія ён да таго ўжо адбыў у ізалятары часовага ўтрыманьня Віцебску. Тым самым судзьдзя сваім рашэньнем прыкрыла незаконнае затрыманьне Бярлінава і ўтрыманьне яго пад арыштам без рашэньня суду.

Пётар Бярлінаў, не зьяўляючыся ані журналістам, ані грамадзянскім актывістам, па азначэньні ня мог быць датычным да арганізацыі і правядзеньня публічнага мерапрыемства і выказваць празь яго свае грамадзка-палітычныя погляды. Зыходзячы з гэтага факту, ён палічыў, што суд ня ўзяў пад увагу ўсіх абставінаў яго адміністрацыйнай справы і разгледзеў справу няпоўна, неўсебакова і неаб'ектыўна. Паводле яго глыбокога перакананьня, судзьдзя Цыганкова была прадузятай, бо адназначна стала на бок абвінавачваньня і ня высьветліла ўсе акалічнасьці і фактычны бок справы, ня стала знаходзіць аб'ектыўныя дадзеныя пра яго невінаватасьць і недатычнасьць да правапарушэньня.

Больш таго, Пётар Дзьмітрыевіч палічыў судовае рашэньне несправядлівым яшчэ і таму, што астатнія ўдзельнікі пікетаваньня (гэтак удзел ва флэшмобе быў кваліфікаваны судом) былі пакараныя штрафамі, і толькі ён, адзіны зь сямі ўдзельнікаў, за тое ж самае правапарушэньне быў падвергнуты адміністрацыйнаму арышту.

«Адміністрацыйны арышт быў успрыняты мною як пакараньне, не прапарцыйнае зьдзейсьненаму ўчынку. Бо адміністрацыйны арышт зьяўляецца пакараньнем, якое расцэньваецца грамадзтвам і дзяржавай як найбольш карнае, г.зн. ужываецца толькі ў крайніх, асаблівых выпадках у адміністрацыйнай вытворчасьці. Што я такога супрацьпраўнага ўчыніў, каб улады мяне гэтак сувора пакаралі?!» – напісаў у КПЧ спадар Бярлінаў.

Скаргу віцебчука пракамэнтаваў праваабаронца Леанід Сьвецік:

– Калі зыходзіць з матэрыялаў адміністрацыйнай справы, то, сапраўды, учынак Бярлінава можна расцаніць як удзел у пікеце. Няхай так. Але з тых жа матэрыялаў відавочна, што ён сваімі паводзінамі ніякім чынам не парушыў правоў і не нанёс шкоды рэпутацыі іншых асоб. Апроч таго, Бярлінаў не пасягаў на бясьпеку, грамадзкі парадак і маральнасьць насельніцтва, што ахоўваюцца дзяржавай. Прынамсі, яму гэтыя дзеяньні ня ставіліся ў віну ані ўладамі, ані судом.

Адвольны арышт і ўтрыманьне пад вартай без судовага рашэньня, а таксама дзеяньні суду па прыцягненьні Бярлінава да адміністрацыйнай адказнасьці ў выглядзе пазбаўленьня волі і ўтрыманьня пад вартай за бязьвінныя дзеяньні – гэта відавочнае парушэньне асноўных правоў чалавека, якія замацаваныя як у Канстытуцыі краіны і іншых нацыянальных заканадаўчых актах, так і ў міжнародных дамоўных забавязаньнях Рэспублікі Беларусь.

У дзеяньнях суду першай інстанцыі па справе Бярлінава ўгледжваецца відавочнае парушэньне правоў чалавека на справядлівы разбор яго справы кампэтэнтным, незалежным і непрадузятым судом. Да таго ж выклікае шкадаваньне, што і касацыйная, і наглядныя судовыя інстанцыі праігнаравалі ўсе довады Бярлінава, выказаныя ім у сваю абарону, і не знайшлі ў іх рэабілітуючых абставінаў.

І галоўнае. Права грамадзян на свабоднае выказваньне меркаваньня і на мірныя сходы ёсьць надзвычай важнае грамадзянскае і палітычнае права. Дзяржава, Рэспубліка Беларусь, добраахвотна ўзяла на сябе міжнароднае забавязаньне быць гарантам рэалізацыі беларускімі грамадзянамі гэтых правоў.

Факты і акалічнасьці, выкладзеныя ў паведамленьні Пятра Бярлінава, камітэт палічыў дастатковымі для прыняцьця яго скаргі да разгляду. КПЧ зарэгістраваў скаргу пад нумарам 2708/2015 і паведаміў пра гэта беларускім уладам.

Цяпер улады краіны абавязаныя паведаміць Камітэту сваю пазыцыю наконт справы Бярлінава, аргумэнтавана даказаць міжнароднай супольнасьці правату сваіх дзеяньняў. У выпадку калі довады афіцыйных асоб беларускай дзяржавы ня будуць пераканаўчымі і скарга будзе задаволеная, уладам неабходна будзе ліквідаваць усе дапушчаныя парушэньні і аднавіць правы Пятра Бярлінава, а таксама пакрыць яму матэрыяльную і маральную шкоду ў выглядзе грашовай кампэнсацыі.

Лявон Яфрэменка, Віцебская вясна






Видео

Блоги

Профиль
Войти через:



Календарь
«    Июль 2018    »
ПнВтСрЧтПтСбВс
 1
2345678
9101112131415
16171819202122
23242526272829
3031 

Карта новостей

Вернуть ли белорусскому языку статус единственного государственного?


  • ВКонтакте
  • Одноклассники

Баннеры
Праваабарончы цэнтр Вясна

Падтрымаем вязьняў!

Счетчики