Закончыўся суд па крымінальнай справе Яўгена Парчынскага. Прыгавор -- 7, 5 мільёнаў штрафу

Пяць гадоў таму, за год да прэзідэнцкіх выбараў, я збіраўся ўзначаліць перадвыбарчы штаб кандыдата ў прэзідэнты Мікалая Статкевіча па Полацкаму і Наваполацкаму рэгіёну. І тут даведваюся, што супраць мяне распачалася крымінальная справа. Я не веру ў такія супадзенні.

Наколькі вядома, гэтую справу пяць гадоў таму спынілі…

Так, адвакат яшчэ на стадыі следства даў зразумець следчым, што справа нікчэмная і разваліцца ў судзе. Яе спынілі. Але ж час ідзе, стары "шкілет” вырашылі выцягнуць з шафы. І дзівоцтвы пачаліся яшчэ ў верасні мінулага году, калі да мяне на кватэру прыйшлі з вобшукам, хоць нічога і не знайшлі. Магчыма, гэта было звязана з доктарам Ігарам Пастновым, якога за пошукі праўды накіравалі ў псіхіятрычную бальніцу. Ігар змог перадаць ліст з бальніцы, але за дзень да вобшуку я перадаў яго ў міжнародныя праваабарончыя арганізацыі. Можа быць, тады гэты ліст і шукалі?

Але чаму аднавілі справу?

Я для мясцовых уладаў ужо даўно, як костка ў горле, таму, напэўна, вырашылі нейтралізаваць. Я працаваў у перадвыбарчых штабах Аляксандра Казуліна, Мікалая Статкевіча, Дзмітрыя Усса, балатаваўся на мясцовых выбарах ад кампаніі "Гавары праўду”. Праз год – чарговыя прэзідэнцкія выбары ў краіне, я ізноў планаваў актыўна дапамагаць дэмакратычным кандыдатам… Усё гэта асобным людзям, безумоўна, не падабаецца. Але, паверце, нават калі мяне ізалююць, то будзе каму замяніць.

Хто вас падтрымлівае ў такі складаны перыяд?

Я хачу падзякаваць усіх, хто працягнуў руку дапамогі ў насамрэч складаны для мяне жыццёвы перыяд. Гэта і Праваабарончы цэнтр "Вясна" і кампанія "Гавары праўду”, Дзмітрый Усc, дэмакратычная грамадскаць нашага рэгіёна… Такая падтрымка надае моцы і застаўляе верыць у лепшае. А якім яно будзе – пабачым…